Vísindi frá villum heilum

Heini í Skorini er ein av 20 granskarum í Føroyum, Danmark og Grønlandi, sum hava givið sítt íkast til eina bók um nakrar av teimum stóru spurningunum í heiminum, ið granskarar royna at fáa greiði á.

Bókin kallast “Videnskab fra vilde hjerner” og er sera breið, løtt at lesa og vælegnað til lesandi og onnur við áhuga fyri vísindi.

Í bókini greiða granskararnir frá teirra gransking í stórum evnum, ið hava týdning fyri heimin í dag, og um hvussu teir royna at kortleggja verðina.

Greinin hjá Heina í Skorini snýr seg um talufrælsi og átrúnað, og um hvussu tøknirisarnir hava kollvelt alt orðaskiftið um innlendis og altjóða sensur. Aðrir granskarar, ið eru við í bókini, eru millum annað Morten Meldal, nobelprísvinnari og alisfrøðingur, Svend Brinkmann, sálarfrøðingur, Lone Simonsen, farsóttargranskari, Trine Baumbach, professari í revsirætti, og Minik Rosing, jarðfrøðingur.

Bókin byggir á poddvarpið “Videnskab fra vilde hjerner“, har Anja C. Andersen, stjørnualisfrøðingur, saman við øðrum hevur havt samrøður við eina røð av granskarum.

Les meira um bókina "Videnskab fra vilde hjerner" her.