Skriva út
Lagt út: 23.04.2019

Maria Skaalum Petersen nýggjur leiðari í Depilinum fyri Heilsu- og Almannagransking

Í hesum døgum er vaktarskifti í leiðsluni í Depilinum fyri Heilsu- og Almannagransking. Maria Skaalum Petersen hevur tikið við sum leiðari fyri Magna Mohr, sum hevur verið leiðari seinasti 3 trý árini. Depilin er væl stuðlaður úr Sjúkrakassagrunninum. 

Í 2014 gjørdu Fróðskaparsetur Føroya, Landssjúkrahúsið og Deildin fyri Arbeiðs- og Almannaheilsusamstarvsavtalur. Avtalurnar hava millum annað til endamáls at menna heilsuvísindaliga gransking og útbúgving í Føroyum. 

Ein partur av samstarvinum millum hesar stovnar er Depilin fyri Heilsu- og Almannagransking sum byrjaði sítt virksemið í 2016. Kjarnufíggingin til depilin kemur úr Sjúkrakassagrunninum. 

Tá Sjúkrakassaskipanin varð avtikin, varð avlopspeningur settur í grunn, nevndur Sjúkrakassagrunnurin, ið hevur til endamáls at menna heilsuøkið í Føroyum. Nevndin ásetti tá í leiðsreglunum, at ein fittur partur av fænum skuldi brúkast til at menna granskingarsamstarv millum hesar partarnar og aðrar partar á heilsuøkinum í Føroyum. Depilin hevur higartil fingið 7 mió. kr úr Sjúkrakassagrunninum. Harafturat eru fleiri verkætlanir stuðlaðar, sum eru knýttar at deplinum.  

Sambært Depilsleiðsluni er verulig ferð nú komin á heilsugransking í Føroyum. Í 2018 komu ímillum 70-80 vísindaligar greinar út í altjóða tíðarritum frá hesum trimum stovnunum, sum mynda Depilin fyri Heilsu- og Almannagransking. Depilin hýsir í dag fleiri ph.d.-verkætlanum. Eisini eru føroysku heilsugranskararnir í størri mun enn áður høvuðsgranskarar á teimum verkætlanum, sum verða gjøgnumførdar, og fjølbroytni á evnum og granskingarhættum er nógv størri.

Magni Mohr, dekanur og professari á Fróðskapararsetrinum, sum hevur verið leiðari í Deplinum seinastu trý árini, leggur frá sær og verður nú partur av stýrisbólkinum. ”Depilin er ein platformur fyri allar heilsugranskarar í Føroyum, og menningin innan heilsugranskingarøkið hevur verið ómetaliga stór síðan Depilin var stovnsettur, sigur Magni Mohr, sum nú handar stafettina víðari til Mariu Skaalum Petersen.

Maria er lektari á Fróðskaparsetrinum og royndur granskari á Deildini fyri Arbeiðs- og Almennaheilsu. Hon hevur sitið í stýrinum seinastu tvey árini og verður nú nýggjur leiðari. ”Eg gleði meg at menna Deplinin longur fram á leið, soleiðis at virksemið kann økjast og heilsugransking kann gerast meira sjónlig og avgerandi í samfelagnum”, sigur Maria Skaalum Petersen.

Í stýrinum fyri Depilin fyri Heilsu- og Almannagransking sita Kasper Kyhl (LS), Pál Weihe (DfAA), Sigurð í Jákupsstovu (FF) og nú eisini Magni Mohr (FF).

Les meira um Sjúkrakassagrunnin her 

Innihaldið er ikki tøkt, tí tað hevur marknaðarførings farspor, sum tú ikki hevur góðtikið. Trýst her fyri at góðtaka marknaðarførings farspor.