Skriva út
Lagt út: 13.04.2018

Havstovan fingið stuðul til streymmátingar eitt ár afturat

Havstovan søkti í vetur um fígging frá Dancea grunninum hjá Energistyrelsen í Danmark til at halda fram við týdningarmiklu mátingunum av Føroyastreyminum og rákinum í Bankarennuni. Energistyrelsen hevur nú játtað 800.000 kr til hesar mátingar. 

Í verkætlanini verða streymmátarar lagdir út nú í summar og tiknir uppaftur á sumri 2019. Harafturat verða tvær rammur við hitamátarum settar á botn, og við teimum fer at bera til at máta hitan niðri við botn í upp til fýra ár. Í sambandi við, at Energistyrelsen hevur játtað fígging til fleiri verkætlanir, er tíðindaskriv sent út, og heimasíðan hjá Danmarks Radio hevur m.a. skrivað um verkætlanina FARMON II hjá Havstovuni – tað skrivið kann lesast her.  

FARMON II-verkætlanin er framhald av FARMON-verkætlanini, sum eisini er fíggjað av Dancea. Tann verkætlanin byrjaði 1. apríl 2017 og endar 31. mars 2019. Meiri er at lesa um FARMON her.

Havstovan er partur í fleiri altjóða verkætlanum og fær fíggjarligan stuðul bæði frá føroyskum, donskum og europeiskum skipanum. 

Sí yvirlit yvir verkætlanir her

Innihaldið er ikki tøkt, tí tað hevur marknaðarførings farspor, sum tú ikki hevur góðtikið. Trýst her fyri at góðtaka marknaðarførings farspor.