Granskingarráðið tekur valfepurin viðvíkjandi gransking, menning og nýskapan í Føroyum

Í nýggju ársfrágreiðing Fróðskaparsetursins eftirlýsir Magni Mohr, prorektari, visjónir. Hann sigur:

”Einstakar verkætlanir verða vanliga væl viðgjørdar í miðlunum, og hetta er gott, men ov drúgt er millum snapsarnar, tá talan er um, at politisku Føroyar vísa, at tær síggja møguleikarnar at gagnnýta ta ómetaliga fjølbroyttu serfrøðina, sum er á einum universiteti.”

Nú løgtingsval er í hondum, hevur Granskingarráðið sett øllum politisku flokkunum fýra spurningar um gransking, menning og nýskapan, fyri at hoyra teirra hugsan.

Spurningarnir eru sendir við áheitan um svar tíðliga í komandi viku.

Spurningarnir eru:

1. Hvønn týdning hava gransking, menning og nýskapan fyri samfelagið?

2. Hvat er tykkara visjón fyri gransking, menning og nýskapan í Føroyum?

3. Nevn onkra granskingarverkætlan, sum tit halda, vit áttu at farið undir í Føroyum í næstum.

4. Eru onkur ítøkilig átøk, tykkara flokkur ætlar at fremja til frama fyri gransking, menning og nýskapan í Føroyum?

Svarini frá flokkunum verða løgd á gransking.fo, so hvørt tey koma inn.

Umframt at svara spurningunum omanfyri, eru flokkarnir bodnir at taka “Granskingarkvissina”.

Tú kanst eisini royna teg her