Fyrstu granskararnir klárir at flyta inn á Granskarasetrið
Granskarasetrið er nú við at verða til reiðar at taka ímóti teimum fyrstu granskarunum. Hølini í bygninginum hjá Vinnuframa á Smyrilsvegi eru mestsum klár, og mánadagin verður farið undir at seta innbúgvið upp.
Fyribils hevur bert Fiskaaling gjørt leigusáttmála við felagið iNOVA, ið rekur Granskarasetrið. Fiskaaling flytir alt sítt granskingarvirksemi frá starvsstovuni við Áir til Havnar. Tveir ph.d.-granskarar á Fiskaaling hava longu bílagt sær skrivstovur á nýggja Granskarasetrinum.
Landssjúkrahúsið og Fróðskaparsetrið eru í holt við at orða sáttmála við iNOVA, men enn er ikki endaliga greitt, hvat virksemi talan verður um.
Fleiri aðrir granskingarstovnar í Føroyum og í Danmark hava eisini víst áhuga fyri at vera við.
-Vit hava enn fleiri fuglar á takinum enn í hondini. Men Granskarasetrið hevur longu havt við sær, at samstarvið millum granskingarstovnar er vorðið betri, tí stovnarnir hava verið saman um at innrætta setrið, og fleiri stovnar eru nú farnir at orða granskingarverkætlanir saman, sum skulu staðsetast í Granskarasetrinum, sigur Sjúrður Johansen, samskipari hjá Vinnuframa.
Arbeiðið at umbyggja hølini á Smyrilsvegi, sum Rúsan hevur húsast í, til granskarasetur hevur gingið væl. Hølini, ið eru ætlað til gransking innan DNA, evnafrøði og biotøkni, eru heilt liðug, og handverkararnir eru nú við at leggja seinastu hond á vátrúmið og køkin, ið skal brúkast til gransking í matvørum.
Granskarasetrið hevur góðar karmar til gransking, men tól verða eingi í fyrstu atløgu. Arbeitt verður við ymiskum leistum fyri at fáa fígging til tól, men fyribils mugu granskingarstovnar sjálvir hava tey tól við, ið teir skulu brúka.
-Ætlanin er ikki at flyta frammanundan vælvirkandi granskingareindir í Granskarasetrið. Stovnar og virkir skulu síggja fyrimunir í at flyta teirra virksemi í Granskarasetrið. Granskarasetrið bjóðar góðar karmar til gransking og møguleikar hjá stovnum at byggja brýr til vinnuna, og harvið fáa føroyskir granskarar betri innlit í avbjóðingarnar hjá vinnuni. Harumframt verður Granskarasetrið eitt upplagt høvi at staðseta nýggjar verkætlanir, sigur Sjúrður Johansen.