Skriva út
Lagt út: 01.09.2015

13 fólk hava søkt stuðul til heilsugransking

Tá freistin at søkja stuðul til gransking úr Sjúkrakassagrunninum var úti á middegi, vóru 13 umsóknir komnar inn.

Hetta er væl lægri enn í fjør, tá 28 umsóknir komu inn. Ein orsøk til hetta er uttan iva, at 7 fólk fingu stuðul til verkætlanir frá hesum økinum í fjør, og 3 fólk fingu stuðul úr Granskingargrunninum í mai til heilsugransking. Hesar verkætlanirnar eru júst farnar í gongd ella um at fara í gongd.

Stuðul kann latast á 5 ymsum økjum og umsóknir eru komnar til øll økini. Tað kunnu latast í mesta lagi umleið 1,5 mill. kr. til hvørt øki, tó til samans í mesta lagi upp til knappar 6 mill. kr. í hesum umfarinum.

Umframt vanligu treytirnar at umsøkjarin skal vera føroyingur, ella at verkætlanin á annan hátt skal hava týdning í føroyskum høpi, so er ásett, at granskarin í hesum umfarinum skal søkja saman við einum føroyskum stovni, og at allur játtaði stuðulin skal nýtast i Føroyum.
Nú verður farið undir at kanna umsóknirnar fyri at vita, um tær lúka formligu treytirnar. Síðani skulu útlendskir serfrøðingar finnast, sum skulu meta um vísindaligu góðskuna í umsóknunum.

Ein faknevnd er sett at viðgera og meta um umsóknir til Sjúkrakassagrunnin. Faknevndin ger tilmæli til Granskingarnevndina, sum tekur endaliga støðu.

Les meira um Sjúkrakassagrunnin her

Innihaldið er ikki tøkt, tí tað hevur marknaðarførings farspor, sum tú ikki hevur góðtikið. Trýst her fyri at góðtaka marknaðarførings farspor.