Skriva út
Lagt út: 07.02.2017

EURAXESS er kunningartænasta fyri ferðandi granskarar

Granskingarráðið hevur bygt upp og hýsir nú EURAXESS tænastu, sum skal gera tað lættari fyri granskarar at flyta millum lond at arbeiða í styttri ella longri tíð. EURAXESS er ein tænasta, sum kunnar og ráðgevur um øll hugsandi viðurskifti í sambandi við at fara úr Føroyum út í heim at granska ella at koma til Føroyar sum granskari.

Tænastan í Føroyum er partur av netverki við umleið 200 deplum í 40 londum.

Viðkomandi upplýsingar fyri granskarar, sum vilja koma til Føroya ella fara út í heim at granska, eru savnaðar inn og miðlaðar. Upplýsingarnar eru m.a. um skattaviðurskifti, uppihaldsloyvi og onnur praktisk viðurskifti í samband við at flyta til annað land. Her er kunning til granskaran og til familjuna, um hon kemur við. Eisini eru lýsingar av føroyska granskingarumhvørvinum gjørdar.

Tilfarið er skipað í eina hondbók og ein portal á enskum og føroyskum. Portalurin liggur á www.euraxess.fo

Ein týdningarmikil partur av portalinum er tænastan EURAXESS Jobs. Har ber til at finna leys størv, sum granskingarstovnar í Evropa lýsa við. Møguleiki er at leita eftir størvum innan eitt ávíst granskingarevni og innan landafrøðilig øki. Øll størv, sum verða fíggjað ígjøgnum Horizon 2020, skulu lýsast leys á EURAXESS Jobs. Føroyskir stovnar og virkir kunnu eisini lýsa síni størv her og røkka hvørjum króki í Evropa uttan kostnað.

Umframt hondbók og portal verður skipað fyri verkstovum og skeiðum, har starvsfólk á avvarðandi stovnum hittast og umrøða praktisk viðurskifti og forðingar.