Skriva út
Lagt út: 13.06.2017

Stuðul til vinnu ph.d.-verkætlanir

Hevur tú hugsað um eina granskingarverkætlan, sum kann loysa eina ítøkiliga avbjóðing, menna fakligu førleikarnar og skapa vøkstur í tykkara fyritøku ella tykkara vinnu? Nú er møguleiki at søkja stuðul til eina slíka verkætlan.

Lýst verður eftir umsóknum til vinnu ph.d.-verkætlanir í Føroyum.

Tvey umsóknarumfør

Umsóknirnar verða skrivaðar og viðgjørdar í tveimum umførum:

Í fyrra umfari skal eitt hugskot lýsast. Ein stutt verkætlanarlýsing skal skrivast. Dentur skal leggjast á væntaða nyttuvirðið fyri fyritøkuna og granskingarumhvørvið og á styrkta fakliga netverkið millum fyritøku og granskingarumhvørvi.

Umsóknarfreistin í hugskotsumfarinum er 1. september 2017 kl. 12. Serstakt oyðublað skal nýtast til endamálið. Tak tað niður her

Ein metingarnevnd metir um innkomnu uppskotini og bjóðar bestu umsóknunum víðari til seinna umfar.

Ein fullfíggjaða umsókn skal sendast inn áðrenn freistina, sum væntandi verður 1. desember 2017 kl. 12.

Umsóknirnar verða í báðum umførum mettar eftir hesum krøvum:

- Vinnuligur týdningur og ávirkan

- Vísindalig góðska

- Skipan av verkætlan

Endamál

Yvirskipaða endamálið við stuðulsskipanini er styrkja granskaratilgongdina í vinnuni, styrkja førleikamenning og granskingarpartin í vinnuni og styrkja samstarvið millum granskingarumhvørvið og vinnuna.

Ítøkiliga er endamálið at geva møguleika fyri verkætlanum, sum kunnu skapa nyttuvirði við at menna ella styrkja tilgongdir (prosessir), virkisbygnað, vørur ella tænastur, sum fyritøkan selur.

Hvør kann søkja

Allar føroyskar fyritøkur í øllum vinnugreinum kunnu søkja, um tær lúka nærri ásettar treytir. Krøv eru til stødd og førleikar hjá fyritøkunum. Tað er fyritøkan, sum skal hava høvuðsábyrgd av verkætlanini. Talan kann verða um samtak av fyritøkum.

Í sjálvari verkætlanini skal talan vera um tríggjar partar: Eina fyritøku, eitt universitet og ein ph.d.-lesandi.

Í fyrra umsóknarumfari er tað nóg mikið, at fyritøkan yvirskipað lýsir hugskotið til verkætlan, hvat universitet ætlanin er at samstarva við og hvat slag av kandidati fyritøkan heldur er hóskandi til verkætlanina. Tað ber eisini til at vera neyvari beinanvegin.

Verður umsóknin boðin víðari til seinna umfari, skulu bæði fyritøka, universitet og gjarna eisini ph.d.-kandidatur verða við í umsóknini. Tann fulla umsóknin skal tí skrivast á enskum.

Fíggjarkarmar

Tað eru knappar 3 mill. kr. tøkar at luta út til 2-3 ph.d.-verkætlanir og møguliga til nakrar smærri verkætlanir.

Fíggjarligi stuðulin kann verða upp til 50% av kostnaðinum av verkætlanini, tó í mesta lagi 1 mill. kr. Játtaðar verða fastar upphæddir til løn, til rakstur og til gjøld til universitetið. Almenna fíggingin av verkætlanini kann í mesta lagi verða 50% í alt.

Viðgerð av umsóknum

Í fyrra umfari eru tað umboð fyri Vinnuhúsið, Granskingarnevndina og Granskingarráðið, sum lesa og meta um umsóknirnar. Í seinna umfari verða umsóknirnar mettar av tveimum serfrøðingum, einum úr Føroyum og einum uttanlands.

Les meira um ítøkiligu krøvini her

Hevur tú spurningar, ber til at ringja á 567803 ella senda ein teldupost til annika@gransking.fo

Tak umsóknarblað niður her

 

Tilvildarlig mynd